› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
壹週Plus 飲食男女 Ketchuper 青雲路 交易通.搵車快線 Tomonews Apple VR Famitsu
2017年04月21日

【動畫●港男福音】娶韓妹的理由 貼大床仲包家電

190,857
最後更新: 0421 10:19 / 建立時間 (HKT): 0421 07:02

【尋找首爾的香港】港女嫁Oppa做人妻聽得多,事關韓國傳統男主外女主內,人妻嫁去嘆世界,之但係,如果倒轉係港男做人夫捱世界呢?

港男Gary早喺2000年離鄉別井到韓國打工,順理成章識到韓國女生,喺當地結婚生子組織小家庭。佢話當年孭住香港人嘅身份「好吃香」,「17年前,當我同韓國人講係自香港,佢哋就會話『哦~張國榮、周潤發...』,當年香港係幾出名㗎,所以識女仔都容易啲!」

好少人會用「溫柔」形容韓國女生,但Gary話其實韓國好大,唔同地區嘅女生性格都唔同。韓國主要分六大區域,包括京畿道、江原道、全羅道、慶尚道、忠清道,以及濟州島。Gary話全羅道嘅女生最溫柔,反而大佢兩年嘅太太,係典型慶尚道女生,出身自釜山廣域市,相比下強勢得多,「全羅道嘅女仔比較識講嘢,婉轉啲,但係慶尚道嘅女仔就相反,硬崩崩又直接!」

Gary舉咗個例,話當年太太仲係女朋友嘅時候,已經對佢好嚴苛,「嗰時買咗部兩門嘅韓國現代跑車,佢同我講,『唉...你都廿幾歲人啦,點解仲揸埋啲死飛仔車呢?』雖然畀佢話,但係我又覺得幾甜。」所以婚後,Gary換咗部四驅車,太太就讚佢,「o依部咪好囉!擺嘢又擺多啲!」

正所謂「聽老婆講會發達」,Gary結婚嗰陣都慳咗唔少,「結婚嘅時候,泡菜雪櫃、雪櫃、微波爐、電視機,甚至張床褥,都係我岳母買嘅,即係貼埋大床!」咪以為咁講好似好衰,其實只係跟返韓國傳統,由女方畀禮金,負責新居嘅傢俬電器。至於買樓,以及日後一切開支,都由男方獨力承擔!

雖則韓國傳統係男主外女主內,但係對於家中嘅婆媳關係,Gary都唔能夠置身事外!Gary話媽媽只係一年嚟韓國探望一次,所以婆媳相處時間唔多,尚算和平。Gary話最好笑係太太會嘗試同奶奶講廣東話,講到好似4、5歲小朋友咁,「奶奶,慢慢死(食),死(食)多啲呀奶奶」。

不過,婆媳關係能夠和平,都因為Gary喺背後好識做。佢舉例,有次佢媽咪買咗萬幾蚊燕窩,拎去韓國煲畀新抱飲,「當時韓國人唔知燕窩呢樣嘢,我媽遞碗燕窩畀太太,太太就笑笑口接住,講『唔該,唔該』,但係我媽一行開,太太就遞畀我,話『快啲飲咗佢!快啲飲咗佢!』當時我嘅反應係全部飲晒,唔使令兩邊都難做吖嘛!」

一轉眼,結婚已經十幾年,究竟做韓國人夫好,定係香港人夫呢?Gary話如果講到承擔一頭家,就梗係做香港男人好啲,「始終兩公婆一齊出去搵錢,唔會有種無形嘅壓力。」不過佢話凡事都有兩面睇,認為太太都有壓力,「佢要承擔照顧小朋友嘅壓力,教得好唔好,都係因為佢。託賴啦!大女連續兩年都考第一,要多謝太太!」

Gary由20歲o靚仔,到為人夫,為人父;由打工仔,到同朋友夾份開餐廳做老細,喺韓國渡過半生,但毋忘自己嘅根,「香港係我屋企,始終做人都係要有根,有時同老婆吹水都會話,等我百年歸老都要返香港,叫佢要擺我返香港!」

記者:鄒倩婷(阿仙)
攝影:李錦鏵、陳家文
剪接:Roy

追實城中突發大小事,即 like 蘋果【現場】FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載