› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年06月19日

【曾經有合作關係】Celine爸爸道義上有問題? 薛家燕:希望佢唔好影響到個女

614,389
最後更新: 0619 23:31 / 建立時間 (HKT): 0619 22:59

【新增回應】
近日因為參加《全美一叮》(America‘s Got Talent)嘅比賽片段一夜成名嘅Celine(譚芷昀)噚日就同爸爸一齊現身機場,搭飛機去旅行。不過人紅就梗係是非多o架啦!仲有人直指親手培養Celine妹妹嘅爸爸譚順生有問題,而苦主竟然係家燕姐!

事源係Celine曾經係「家燕媽媽藝術中心」嘅學生,而Celine當年仲係喺家燕姐介紹下去大台參加節目,其後喺2014年參加《中國新聲代》亦係由家燕姐穿針引線,不過家燕姐就好似對譚爸爸有微言。

問及家燕姐係咪一早認識Celine爸爸?佢話:「係呀,Ceine大約四五歲嗰陣就嚟家燕媽媽嗰度學嘢,我認識佢(譚先生)就應該係新城電台嗰陣識,佢唔知係咪參加個比賽定乜嘢,我唔記得,見到佢囡囡好精靈,同埋把聲好靚,咁我就問佢有冇興趣嚟我哋學校上堂呀?咁佢就嚟咗上演藝班嘅。佢爸爸教佢唱歌嘛。」

原來譚順生後來成為「家燕媽媽藝術中心」嘅導師,家燕姐話:「後來佢爸爸(即譚先生)就上嚟自薦,話想喺我哋度做音樂導師,咁好啦。」咁之後發生咩事令家燕姐對譚順生有戒心?佢苦笑話:「應該係話失望。做我哋呢行,尊重行規,咁你自薦上嚟教,就算有乜嘢學生要補課,或者係要點樣上堂,都係要同我商量,就唔係嗌啲學生去佢個工作室上堂嘅。」

家燕姐續指:「我最初都唔知嘅,咁逐個逐個學生去咗佢度上堂,啲學生話學費好貴,我收二千幾,佢成萬幾蚊,走返嚟問我哋,問『家燕媽媽知唔知我哋去佢度上堂好貴呀?上完又要再俾。』我就『下?點解會咁㗎?』因為我就冇理到佢嗌啲學生去佢度上堂。我都唔知佢點聯絡啲學生,梗係逐個學生攞電話啦。就算個學生要上乜嘢堂,佢都應該要同我講聲。咁我諗起碼…佢喺我度教咗半年左右啦,咁我覺得『咦,呢個人道義上有啲問題喎,咁我決定唔用佢。』

家燕姐不忘大讚Celine唱歌有天份同好乖。所以有合適工作都會安排畀Celine妹妹,佢話:「推薦過佢去無綫拍MV同母親節節目,大陸都有個《中國新聲代》。當時佢好似想去參加,但參加唔到,咁可能嗰期嘅年齡問題,咁佢有同我講,我話好吖,睇下我嘅關係可唔可以幫到佢,咁後來聯絡到湖南衛視畀佢上嗰個節目。」

有指Celine爸爸當正自己有渠道安排學生去比賽,仲喺網站宣傳,家燕姐笑說:「係呀,佢話自己關係好,如果邊個想去就搵佢啦,哈哈哈哈。係啲學生話番畀我聽,我就得啖笑,唉,佢個人都係有點那個,不過真係其實呢啲嘢過咗去架喇,我都好開心佢個女,今次係《全美一叮》攞到個名譽,係一件好事,不過都提一提佢爸爸,以後安排自己做嘅嘢唔好影響佢個女。」

對於好多人擔心Celine太細個唱歌會影響學業?家燕姐就認為唔會:「佢媽媽都ok,只係佢爸爸係佢經理人,所以處理事方面自己要留意。」

而同樣喺「家燕媽媽藝術中心」工作過嘅蔡立兒回應《蘋果》話:「非常感激家燕姐之前給我機會在藝術中心教小朋友唱歌,任教時及現在都不認識及不曾接觸過譚先生及他的女兒Celine,所以對此事一無所知,不便參與任何意見!」

追實城中突發大小事,即 like 蘋果【現場】FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載