› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年08月12日

【咀嘴15歲女惹抨擊】老來得女 李國麟後悔贈手機 感歎父女關係如紙鳶:就斷線

384,344
建立時間 (HKT): 0812 13:09

愛係無分國界、種族與性別,中國人愛得比較含蓄,所以李國麟一張與15歲囡囡李沅薐(Cherie)嘅親嘴合照,惹來網上一陣小風波,有網民認為呢啲係父愛,只要子女唔介意,幾多歲都可以錫;亦有網民以道德標準來批判呢件事( 新聞連結:http://bit.ly/2ux4JS1 ),但係實情旁人又怎可單憑雙眼去衡量呢種愛呢!

62歲嘅李國麟早前就接受周刊專訪,重提與囡囡親嘴一事,他依然有自己一套嘅睇法同做法。

老年得女嘅李國麟,當然錫到個女燶,佢話好多人都話佢將個女寵壞,阿女要乜有乜,李國麟雖然口裏說一,但行為就表裏不一,仲就做到加零一㖭,個女想要乜就買乜。報道中,李國麟就舉咗一個例子,佢話買咗部新電話俾Cherie,三日就唔見咗,老婆就話不如只買一部長者電話俾阿女就算,但係李國麟就靜靜雞咁帶Cherie去買過部新款電話。

李國麟話,記憶中,爸爸當年都係咁好寵阿妹,李爸爸教落,生仔要嚴,因為將來要孭起頭家;生女就要寵,因為唔知佢將來嫁得好唔好,touch wood 將來嫁得唔好,都有父愛同快樂嘅童年彌補番數吖!

講得又好似好有道理喎!

至於62歲爸爸同15歲囡囡咀嘴被網批判一事,李國麟坦言,一直以來佢都唔理會網上嘅討論,佢話由細到大都係咁錫阿女,就算二十、三十歲,佢都會照樣咁錫。李國麟反問,唔通錫阿媽又有問題咩?佢覺得可能係啲人思想保守或者有啲唔愉快嘅經歷影響,先會戴有色眼鏡嚟睇呢件事。佢話當時同阿女慶祝,有好多朋友在場,唔通搞亂倫會咁公開咩?總知,李國麟覺得愛她就錫她,想拖住阿女行街就拖住行街,別人做唔到,但佢就做得到。

從李國麟嘅言詞中,你可深深體會到佢愛女之深,但原來佢都對阿女做咗一件事,而感到好後悔。報道講到,李國麟最後悔嘅事就係買咗部電話俾阿女,佢話依家電話佔咗阿女95%時間,Cherie同手機人機合一。

李國麟好欷歔咁話,以前阿女當自己係偶像,依家偶像變閒角,佢話真係唔敢想像之後阿女拍拖佢會點,但係肯定嘅係佢一定會呷醋,感覺儼如失戀。報道入面仲提到,Cherie有向李國麟透露,有人曾向她表白,幸好阿女拒絕咗,但呢位老竇都好爆炸,竟然問阿女拒愛嘅理由係咪佢同性戀,Cherie即回佢一句:你黐線㗎!李國麟話,覺得阿女遲早都會進入成人世界,佢更形容阿女呢隻紙鳶就快斷,所以佢更珍惜依家同囡囡相處嘅時間。

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載