› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年08月13日

【竟然係咁?】同Bosco街邊兩份篤魚蛋 伍姑娘最開心嘅係…

86,817
最後更新: 0813 17:11 / 建立時間 (HKT): 0813 09:00

如果要喺48歲嘅伍詠薇(伍姑娘)同36歲嘅黃宗澤(Bosco)之間加上一個關係,可以加啲咩?

朋友、同事嗰啲正路嘢啦!姊弟,OK嘅;姊弟戀,都有可能嘅;如果係母子又點睇?

係呀,大家冇睇錯,佢哋被安排做母子呀!換算番,即係伍姑娘11、12歲就生Bosco喇!奇就少少啦,又冇話唔得嘅……

據知伍姑娘喺新劇《飛虎極戰》中,劇情係話佢17歲就生咗Bosco,日前佢哋喺深水埗夜班趕拍《飛》劇街景。現場所見,佢哋喺鏡頭前後都有講有笑,又挨住欄桿不停吹水,Bosco仲買咗碗魚蛋,同「媽打」伍姑娘兩份篤嚟食,Bosco食污糟嘴邊,伍姑娘好自然拎咗紙巾幫佢揩抹,跟住佢將紙巾塞番入袋,呢個「媽打」細心到爆燈!

拍攝期間,吸引好多途人圍觀,大家都拎手機搶拍,攝製隊工作人員係咁高舉發泡膠板遮擋。連日高溫,即使入咗夜,街頭都冇風又翳焗,唔加上拍攝打燈,份外悶熱,所以唔使埋位時,Bosco手執迷你風扇係咁吹住降溫,而伍姑娘就有女助手拎迷你風扇同礦泉水貼身服待。佢哋拍拍吓,因為越嚟越多人圍埋睇,有警察行過嚟,了解完一輪就走咗。

據知,伍姑娘同Bosco係失散母子,關係複雜,Bosco老竇係吳岱融,阿爸早年入黑幫做臥底,搞大咗江湖大佬未成年囡囡個肚,少女珠胎暗結生BB出嚟,被家人送走,劇情就交代Bosco由嫲嫲湊大,佢長大後仲做咗警察,兩母子機緣巧合下得以重逢。

雖然只係拍戲,但難得「索中女」伍姑娘肯升呢做阿媽,仲要係Bosco咁大個仔,伍姑娘噚日接受《蘋果》電話訪問時話:「或者好多女演員覺得扮阿媽角色係包袱,但我唔介意,演員應該嘗試唔同角色,希望觀眾代入呢個角色去睇,唔好當我係現實伍詠薇。最初接《飛虎》,我知佢係男人戲,我一直想同三哥(苗僑偉)合作,我聽咗個古仔,我演反派,好大挑戰,仲話我有個仔。其實我出道已做過幾歲仔嘅媽咪。但突然知道係Bosco,我都係大佢12年,我接咗就諗點處理呢個角色同呢段母子關係,加上套劇有王敏德、張兆輝等卡士唔可以錯過。」伍姑娘話唔介意做人阿媽:「我乜都唔驚,做演員,唔好只係諗住好靚,肥醜都冇問題,演員係要投入角色,忠於角色,呢次拍得好好玩、好開心、好順利。」

問到佢有Bosco做自己個仔係咪好開心?伍姑娘直言:「角色對手唔到我揀,由樂小姐(樂易玲)同監製佢哋揀,我覺得人哋抽畀你,你同佢合作先過癮。呢次係我瘦咗19磅拍劇,好開心。」

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載