› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年08月14日

【星級夫婦晒恩愛】劉青雲郭藹明低調Sweet 陳豪接老婆機閃爆機場

27,967
建立時間 (HKT): 0814 00:02

近年有個好流行嘅term叫放閃,即係話啲人晒恩愛咁啦!有啲係專登閃俾大家睇,但最攞命係佢哋不經意做咗,而本身係閃爆嘅,先最有殺傷力。

陳豪、陳茵媺
陳豪同陳茵媺呢對夫婦,淨係三年抱三,已經知佢哋夫妻恩愛,勤力造人。不過,陳豪都唔係只顧造人,睇佢日前喺機場等老婆仔女返港嘅行徑,就知佢最錫嘅係邊個。嗰日陳豪一見老婆仔女出閘,即時上前迎接,跟住就係戲肉——錫啖老婆先,咪睇嗰一啖仔,見陳豪啲眼神同手勢,就知佢幾掛住個老婆,之後先到3個仔女,果然係愛妻號典範!(新聞連結: http://bit.ly/2ww6E6J )

劉青雲、郭藹明
除咗電視界,電影界都有對閃爆模範夫妻,影帝劉青雲同郭藹明於1998年結束7年愛情長跑結為夫妻,多年來,在外打拼嘅係青雲,郭藹明專注「主內」,只係間唔時陪老公出席大場合,例如電影頒獎禮,近年多咗啲商業活動咁啦!其他時間會見到佢哋拍拖行街,嗰種低調而和諧嘅老夫老妻味,唔係想做就做得出。青雲舊年連開公司都要命名「小飛船」,擺明冧妻(新聞連結: http://bit.ly/2hWXtJa ),真係恨都恨唔到咁多。

丁子高、楊千嬅
至於音樂界,都有經常放閃夫婦嘅例子,好似啱啱喺大前日慶祝註冊結婚周年紀念嘅楊千嬅同丁子高咁(新聞連結: http://bit.ly/2wU7qd0 ),兩夫妻雖然各有各忙,但係又不時見佢哋會互相出席對方嘅活動,以行動支持另一半。丁氏夫婦亦好注重家庭生活,不時帶埋囝囝Torres出遊,一家三口勁融洽。每當遇上啲大節日同紀念日,只見丁子高同千嬅點都會有啲表示,輕則社交平台貼張相,大則搞派對大肆慶祝,非常重視生活情趣。

單立文、胡蓓蔚
近年喺大台越撈越多瓣數嘅單立文(豹哥)同老婆胡蓓蔚都係圈中算係真‧恩愛夫妻,雖然佢哋兩個喺幕前甚少同場,不過,私生活上經常見佢哋行孖咇,喺社交平台上會有對方嘅蹤影,最強嘅係就算胡蓓蔚要同自己「胡說八道會」班姊妹——即係胡杏兒、胡定欣同黃智雯等等去飯局,豹哥一樣可以出席而冇違和感,好似今年3月豹哥58歲生日,胡說八道會為佢開生日會,豹哥可以當住老婆面瞓上班姊妹大髀,老婆唔嬲仲玩埋一份(新聞連結: http://bit.ly/2fCkcJH ),對老公投以信心一票,仲唔係恩愛夫妻嘅鐵證?

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup
© 2017 AD Internet Limited. All rights reserved. 版權所有 不得轉載