› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2012年10月09日

綠葉王:陳安瑩做足100分

17,024
陳安瑩清楚知道自己的存在價值,至於在觀眾心目中的地位如何已不重要。攝影:陳慧安

俗語有云:牡丹雖好,都要綠葉扶持。其實近年在觀眾心目中,不少綠葉比牡丹還好看和耐看,像早前無綫劇集《怒火街頭2》中的陳安瑩(瑩瑩),兩場喊戲喊出戲味扣人心弦。對於觀眾擊節讚賞,瑩瑩只視為本份,她不需大家記住她的名字,每場戲都交足功課的她從未否定自己的價值。撰文:羅美倫

現年54歲的陳安瑩在無綫劇《怒火街頭2》中的嫻姐一角令人印象深刻,兩場喊戲牽動觀眾心靈,原本她在劇中只演普通街坊,拍了幾天戲突然被淡出,把瑩瑩嚇一嚇,幸好最後只是虛驚,原來是監製想她轉演戲份較重的角色。
瑩瑩說:「咁咪冇咗好多個騷?後來監製打畀我,飛紙仔五頁紙稿嚟,話劇本出嚟一定要有人令胡杏兒同鄭嘉穎有鬥爭,佢只諗到我做,抽我出嚟,之前有我嘅場口重拍,佢寧願重拍都要我做呢個角色。」當晚瑩瑩做足功課,結果翌日一take搞掂,同事的讚賞、監製的信心令瑩瑩很滿足。

工作不多偶有財困

此劇也為瑩瑩在無綫32年藝員生涯畫上完美句號,因她已加盟王維基旗下,對瑩瑩來說,到哪裏演戲都一樣:「既然有個新台,叫魔童嘅,都想睇吓佢點,新台個江山得唔得,都叫有份打過,最壞打算咪做配音囉,其實隻船唔沉對整體行業都好,大家都受尊重。」瑩瑩覺得在無綫工作較安穩,但離開則海闊天空,她在配音界也吃香,大家熟悉的角色如《反斗奇兵》的安仔媽咪、《多啦A夢》的大雄媽咪,還有《臥虎藏龍》的章子怡都是瑩瑩配的。
二、三線藝人的工作量不多,很多都要兼職做地產或保險,瑩瑩坦言:「呢啲就係我哋嘅辛酸,唔係日日返工,以前試過幫朋友做美容存倉工作,錢唔多,只係消磨時間覺得自己有用啲。」瑩瑩曾被利誘轉行,但她最終選擇留低做自己感興趣的事。經濟有困難嗎?她說:「都會,就算兼職配音都好耐至收到錢,有啲電影仲會走數,只能好天斬埋落雨柴,我慶幸自己係女,唔掂最多嫁人,男人點算呢?大把人喺無綫30年唔過一萬啦。」

襯阿姐:捨我其誰

對於觀眾未必叫得出自己的名字,瑩瑩倒沒所謂:「佢哋係認角色而唔係現實嘅你,做好角色就得,都係打份工啫。其實乜嘢係主角?我嘅定義係觀眾角度問題,金字塔咁得一個塔尖就係所謂主角,冇下面嗰啲沙石都堆佢唔上,喺工作崗位上我冇覺得自己唔重要喎,雖然可能只得一個鏡頭,我都係做足100%,係你唔睇我咋,我係嚟做戲,唔一定做主角,做妹仔咪妹仔囉,拍《東山飄雨西關晴》做汪明荃近身,係呀,好辛苦至搵到我㗎,冇人襯到佢,捨我其誰!」
當然瑩瑩也曾有擔正的時候,79年她人生第一次在無綫擔正,就是為《體育世界》澳門賽車特輯做主持,她問監製為何選中她,原來是在她做端午龍舟啦啦隊時有好表現,瑩瑩說:「監製話其他人都放棄唔舉棒,得我一個舉囉,原來我做咗嘅嘢唔係冇人睇,最緊要過到自己嗰關。」

與華仔哥哥結片緣

早年瑩瑩在不少港台劇集中做過主角,曾與劉德華合作《江湖再見》,還有與張國榮(哥哥)拍《屋簷下》,讀訓練班時,嘉禾電影公司也找她試鏡:「嗰時《奇謀妙計五福星》叫我買底衫褲拍,唔記得係乜角色,喺屋內五日只着底衫褲拍嘅,如果我肯拍,可能條路又唔係咁行。」不過瑩瑩沒後悔自己選擇的路,她認為成功有很多因素,她也滿足現在的生活。

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup
© 2017 AD Internet Limited. All rights reserved. 版權所有 不得轉載