› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
壹週Plus 飲食男女 Ketchuper 青雲路 交易通.搵車快線 Tomonews Apple VR Famitsu
2017年05月25日

【add紅人主場】
周柏豪人夫未長大

4,894

周柏豪對感情事甚低調,去年32歲生日後在布吉迎娶拍拖多年的圈外女友Stephanie,都做足保密工夫。身份升呢,周柏豪覺得沒有大轉變,「兩個人係一路一齊成長,基本上每日都改變緊。唔係講緊拍拖半個月突然間結婚,而係一齊咗11年嘅時間,決定行呢一步。」微妙的變化暗地產生,他不再忌諱將老婆掛在嘴邊,於早前的紅館個唱含淚感激太太,這次專訪亦不期然讚對方,「我另一半其實所有嘢都好以我為先。」

撰文、造型:林嘉慈  
攝影:周樂恒
化妝:Vinci Tsang
髮型:Cliff Chan of hair corner, assisted by Alson Tam
場地:Shama Central

周柏豪去年11月底與Stephanie拉埋天窗,踏入人生新階段,賦予人夫新身份,他不察覺在生活模式、對人對事的態度上有大改變,反而自覺未長大,「雖然覺得自己係比較成熟去處事嘅人,但係內裏仲有個好細嘅周柏豪喺度,嗰個細嘅周柏豪主導緊我成個人,如果你𠵱家撩我玩,我可以玩到好癲、好喪、好低能,嗰個先係真嘅我。」真我,在與朋友相處、遊玩時出現,文靜的另一面則多在工作時現身。

快速解決問題

在新片《原諒他77次》中,柏豪飾演的張智思經常與蔡卓妍(阿Sa)飾演的女友因小事磨擦,被對方嫌棄長不大,「我第一身,永遠都覺得感情唔係得一方錯,一定係兩方面互相影響先產生問題。久而久之,大家當個問題係習慣,然後大家覺得得過且過,時間會搞掂,遲啲會冇嘢㗎喇,或者𠵱家有嘢啫,唔係好大不了,由佢啦。咁樣令問題好似雪球咁越滾越大,終有一日佢會爆。」
真實的柏豪傾向速戰速決任何問題,從沒有在感情方面遇過雪球效應,「我係一遇到問題就要即刻解決嘅人,我以前有首歌叫《天下大亂》,就係描繪我呢種性格嘅人。瞓覺等過夜,要朝早先講,我係唔可以㗎,同邊個都好,有問題係要坐低講咗佢。」

有溝通互體諒

柏豪自知這種性格有好有壞,「好就係我唔鍾意啲問題隔過夜,令大家有心病。唔好就係令對方唞唔到氣,亦唔放過自己、畀自己沉澱吓。」幸而,他沒有因此與老婆頻頻爭執,「同另一半好有溝通,一遇到問題,我哋係會傾,唔係一邊做嘢,一邊電話傾,而係會坐低傾。」傾傾發生了的問題,傾傾將來,二人才走到今時今日。
更難得的是柏豪與老婆懂得互相體諒,「我另一半其實所有嘢都好以我為先,我真係冇試過喺電影中咁,因遲到而令對方發脾氣。我遲到,我會講我會遲,佢話『冇所謂,take your time啦!』冇經歷過因為嗰種因為遲到、買錯戲飛而同對方嗌交,從來都冇!就係因為我都係咁嘅人,所以唔會介意對方遲到,因為最重要溝通,大家係同一team人,兩個係同一個單位,你遲到咪遲到,你遲到咪等你囉,我咪搵嘢做。」他續說:「等你,係我同你一齊應該要做嘅嘢嚟。」屬暖男系的他,說話和行為都好冧。

「好喜歡小朋友」

問柏豪有否打算為這個二人團隊增添成員?他說:「冇計劃呀,始終𠵱家呢個moment真係放多啲時間喺工作度,為自己打好一個好啲嘅基礎先,呢個係我同我屋企人嘅想法嚟嘅。但係幾時呢?我唔知㗎,我哋冇特別去計劃,但係我同對方都係好喜歡小朋友。」

開騷太多回憶

上月在紅館開完個唱,10月會再開巡唱,周柏豪開騷開上癮,希望將音樂帶到更遠的地方,見更多粉絲,「做演唱會實在太開心,畀到我同團隊太多回憶,可能拍完一套戲、出完一張碟唔會喊,但做完一個騷,大家返屋企係會睇相、send message傾偈,半夜講到喊。做騷係大家擺咗好多精神心血落去,做騷係最正嘅!」

更多精采時尚內容,盡在http://add.appledaily.com。

追實城中突發大小事,即 like 蘋果【現場】FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載