› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年07月18日

第一代廚神憶三毫子紅荳冰情緣
方太初出道教煮餸俾人玩

73,696

【《蘋果》專訪】方太任利莎入廚超過40年,一雙巧手在烹飪節目,煮出一份家的味道,不過回想當年卻是因為廚藝中心的其他廚師想整蠱自己,自己才因禍得福。訪問方太還談到當年17歲來港,在餐廳跟中英混血美男子方達邂逅,締結「三毫子紅荳冰」姻緣。兩人婚後育有兩子三女,婚姻維持了33年和平分開,方太對此謂:「33年係唔容易過,33年嘅離開亦都唔容易」。

方太任利莎是香港人的集體回憶,早前她在將軍澳接受訪問,談到一身好廚藝的由來。她表示父親為民國時期的高官,早在1948年舉家由內地來港定居在北角,當時方太約17歲左右。

前夫靚仔任英軍

任爸爸娶有三位太太,子女18名,方太親生母親早死,她回憶年少時家庭的生活並不快樂,亦成就了她的廚藝:「嚟到香港每日要燒炭煮飯,啲煙熏得好辛苦,我點忍心阿爸做呢啲嘢,冇人做咪我做。每次煮,阿爸都會喺旁邊教話『唔係咁』,佢食慣好嘢,慢慢我就知點煮好食。」因此方太煮得一手美味上海菜。亦因為家庭生活不開心,每星期都會到附近一間冰室減壓,她在那裏跟丈夫邂逅:「好浪漫㗎喎,喺彌敦道屋企舖頭附近有間店,我去食三毫子紅荳冰,係我最開心嘅時間。喺嗰度遇到我先生,佢好靚仔,佢有少少混血。」方太口中這位靚仔,是在英國軍部擔任後備海軍上尉的方達,每次都會花一毫子點歌給方太聽。

方達身高5呎10吋,跟方太同齡,聖誕節方達約她上姊夫家吃飯,拍拖不到一年就結婚,「因為喺屋企唔開心,結婚可以離開屋企。」婚後他們育有兩子三女,可惜這段婚姻維持了33年亦離婚收場,方太說:「我先生係一個非常好嘅人,一個戇直嘅人唔代表可以做一個好丈夫。」亦因為當其中一個越行越遠,另一個表現不成熟時,分歧就出現。
離婚後,方太身邊有過一位曾任職航空公司的知己、伴侶,可惜這位伴侶多年前已經離世,方太帶點欷歔說:「識咗33年,認識嗰陣係大家都唔快樂嘅時候,到後來大家一齊生活咗17年,大家都有大家嘅故事,關係可以講係好知己,亦可以講係一個伴侶。」

高薪與董驃睇齊

眾所周知方太當年在麗的時代的《下午茶》出道,之前在曾超羣的廚藝中心教煮菜,她笑言當年是中心的其他廚師想整蠱自己,卻因禍得福:「嗰時冇人肯去做,做咗幾次之後,個監製問我有冇興趣自己主持一個節目,直到之後嘅《午間小叙》到99年離開亞視前嘅《方太生活廣場》,有人講過當時亞視得我同董驃最高人工。」據知當年董驃講馬已經收一萬元一集。在廚藝中心任教時的方太,亦有過奇遇,試過收過一班全部是大廚的學生,原因是他們都想中心發一張證書用來行船。因為其他導師每堂都被一班大廚玩,方太臨危受命,結果虛心反而獲眾大廚親授實戰心得,令她兼收京、滬、粵菜之長。
採訪:何永寧

追實城中突發大小事,即 like 蘋果【現場】FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載