› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年07月20日

阿梅紀念館鬧租務糾紛
梅媽轟謝偉俊唔賠償

55,058

今年10月10日是一代天后梅艷芳的54歲忌辰,梅媽覃美金除了為爭亡女近億元遺產的是非停不了,最近更因租地方成立梅艷芳國際紀念館,跟業主謝偉俊和白韻琹爆罵戰,她狠批白姐姐代表簽了臨時租約,但其後謝偉俊卻反悔兼拒賠違約金,梅媽扯火大罵:「邊有咁無賴㗎!」

現年94歲的梅媽覃美金、72歲白韻琹和58歲謝偉俊(Paul),三人加埋224歲,雖然年紀大但火氣依然好猛!讀者陳先生向本報爆料,指日前梅媽和兒子梅啟明以「梅艷芳國際紀念館有限公司」名義,以月租44,000元租用銅鑼灣海灣大廈某單位,但業主簽臨時租約後反悔,陳先生為梅媽抱不平:「單位係謝偉俊嘅公司持有,白姐姐代表簽咗臨時租約,夜晚就話成份嘢唔見咗,要梅媽再開支票。點知隔兩日,謝偉俊話唔想出租,正常撻定要賠一個月,但佢退票就算,唔肯賠償。」

白姐姐稱未瞓醒簽約

記者前日致電向梅媽了解,她大動肝火:「佢突然間唔肯租喎,正衰人!咁衰格,就咁畀番張票我就算,邊有咁無賴㗎!謝偉俊呀,佢恃住佢係律師,佢話乜嘢,我唔收張票就告佢啦。我又唔係要求你多,你唔租畀我,梗要畀番(一個月賠償)我。」問到對方為何拒租?梅媽沒好氣說:「佢話業主立案法團唔畀,後來就話唔係幾方便,我有知名度,佢又有知名度。」
簽臨時租約的白姐姐反擊梅媽說:「佢咁講對我唔公道,佢老人家唔同佢計較!從來冇反悔呢樣嘢,因為租樓有程序,但阿Paul話情願留嚟招呼朋友。」當日白姐姐為何肯簽呢?她說:「佢哋(經紀)嚟撳我屋企門(鐘),我都未瞓醒,唔記得清楚佢哋點講。有啲人陰陰濕濕攞嘢畀你簽,你都冇睇清楚畫隻龜仔喺度,唔出奇㗎!」對於梅媽不忿拒租冇賠償,她反斥:「點解要賠畀佢?因為我冇攞過佢任何着數。阿Paul係律師,我係主婦,唔會撩事鬥非。」

謝:違反咗單位公契

至於身為業主兼律師的謝偉俊則稱:「樓本身只係可以用作住宅,而臨時合約有條文講到明要嚟做歌迷會活動,白姐姐簽咗返嚟,我睇到覺得有問題,於是要將條文刪咗去,準備交番畀agent處理,但嗰個agent可能心急,又再拎第二份畀白姐姐簽,亦講咗啲說話,令白姐姐以為咁簽就冇問題。白姐姐唔記得第一份喺我度處理緊,佢以為唔見咗,所以求其咁簽番。總括嚟講係雙方未達成協議情況,文件喺不適當情況下簽署,亦違反咗有關單位公契,我代表公司唔接受呢份臨時合約。」
謝偉俊指支票沒入銀行過數,事件仍在談判階段:「白姐姐被誤導簽名係非常之不幸,所以我話最好大家撤銷協議。」對於梅媽想追討一個月賠償,他說:「如果佢為臨時租約要告我哋,我哋咪打官司囉,以我同白姐姐背景,唔可以隨便違規,唔單止有法律上問題,亦有傳媒監察。」
採訪:皓騫

追實城中突發大小事,即 like 蘋果【現場】FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載