› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2012年01月12日

金手指:一注獨贏中國全通

9,624
中國全通高端業務包括火警、救護、公安、武警等前線工作者嘅衞星通訊系統。

孫柏文呢排撞到啲 Fan屎、舊同事時,經常聽到「喂肥仔,家有冇嘢好買?」呢句說話,而我亦會咁答:「講俾你聽之前,我想問你,中共有乜嘢係點都唔會慳,就算冇錢都唔會 Cut呢樣嘢嘅 Budget?」
咁通常,問我嘅人都會停一停、諗一諗,之後就會估,亦通常我覺得估錯。我聽過嘅答案有「搞基建!」(咁答嘅應該冇睇啲鐵路股表現)、「當啲人民冇嘢食,點都會 Make sure啲人有嘢食!」(好似唔知國家發生過三年災害咁)、「支持環保嘅投資!」( Oh please)。

維穩重要阿爺唔會慳

唯一一個諗都唔使諗,一問即答,仲要係我覺得答得全中嘅就係我哋《蘋果日報》政治版同事 Rapiere,佢答:「梗係維穩啦!」冇錯,國家各級政府唯一唔會減少嘅項目,一定係「維穩」,亦即係 Old school叫「鎮壓」嘅開支。
今日,我就係想用我隻金手指,篤呢間叫中國全通(633)作為我回巢第一隻「一注獨贏」嘅推介。大家作為《金手指》 Fan屎,都知道「一注獨贏」呢個金漆招牌(呢期個招牌係新嘅,因為之前嗰隻打爛咗)。以下就係投資建議。
建議買入:中國全通 目標價: $2.1
有效期至:2012年1月20日
呢間公司做嘅生意,就係通訊問題嘅解決辦法,客戶係內地各級省市嘅政府。佢哋提供嘅服務,低端嘅就係例如各家各戶嘅水錶,由以前要搵個可能收黑錢報細數嘅抄錶人,變成喺個水錶加粒晶片,定時定候將用量以無線通訊方法,直接傳送到市總部。
高端嘅例子,就係例如火警、救護、公安、武警等第一時間前線工作者嘅衞星通訊系統。省市政府要買套特別系統嘅原因,係因為有大事故時,天災或人禍下第一套失效嘅系統,多數都係普通電話網絡,因為唔係有發射塔冧檔,就係太多人同時用。
而2011年,特別係年初,全球都散發茉莉花香,內地領導嘅鼻咁靈敏,一定係聞到鼻敏感要搵藥醫。中國全通亦成靈丹妙藥嘅其中一個供應商。需求自然有如滔滔江水,綿綿不絕。

現價未反映潛在盈喜

咁中國全通喺舊年1月同7月,即年結同半年結之後冇三個禮拜都宣佈盈喜,除之後勁升外,之前都出現春江水暖鴨先知嘅走勢。如果今次真係發盈喜,應該喺下個禮拜發,今周餘下交易日,甚至噚日,都可能出現「春江鴨」走勢。亦因舊年相繼有 Sino Forest、超大現代(682)等事件,就算分析員對盈利睇好,我相信呢間非國企嘅股價,未反映發盈喜呢個可能性。
大家如果跟,而公司真係發盈喜,就喺盈喜後走。唔發嘅,就過年前星期五走,當冇發生過。一注獨贏復出,都算我全面復工囉。

孫柏文
作者為獨立股評人
本欄逢周二、四刊出

孫柏文

追實城中突發大小事,即 like 蘋果【現場】FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載