› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 

大專生做廸士尼兼職 練英文溝通能力

5427
最後更新: 1013 21:22 / 建立時間 (HKT): 1013 20:14

做兼職是每位大學生必做的事,讓生活過得充實,又可賺零用。今年21歲的ouise(符綺庭),在香港專上學院修讀產品設計時,她先後做過時裝店售貨員、補習老師及兼職平面設計師等兼職,而在迪士尼做暑期工,卻讓她感到最有挑戰性,故在畢業後,她再到迪士尼做兼職。由商品部到做船長及動畫師,讓她接觸各式各樣的賓客,除了在溝通技巧上有很大的得着外,英文也有進步。現她計劃由兼職轉為全職,以笑容感染更多客人。

採訪當日,身為遊樂設施及賓客服務部款待專員的Louise,正在迪士尼樂園內的冒險世界當值,期間不斷有賓客問路及小朋友問她拿貼紙,Louise表示不時會遇到賓客問奇怪的問題,「試過有賓客問我園內小火車搭唔搭到去九龍塘;亦試過有賓客拎住樂園嘅地圖,問我澳門喺邊。當刻我好驚訝,但唔可以取笑佢哋,要冷靜處理,認真解釋畀佢哋知。」   Louise現在樂園是兼職工作,每星期約返3天,她平日會在冒險世界的森林河流之旅做船長,及在動畫藝術教室當動畫師。「船長嘅職責係帶一班冒險家入森林河流探險,過程中我要講故事畀大家聽,令大家投入;而動畫師嘅工作係教賓客畫唔同嘅迪士尼人物。兩邊都係對人嘅工作,但面對嘅問題都會有唔同,好似船長主要係提大家注意安全,動畫師就要解決賓客唔識畫嘅問題,好有挑戰性。」   Louise在香港專上學院修讀產品設計,在學時,她做過時裝店售貨員、補習老師及平面設計師等兼職。在14年的暑假,她已到迪士尼樂園當兼職,「我細個好鍾意睇卡通片,尤其係《超人特工隊》、《四眼雞丁》及《五星級大鼠》,所以一見佢哋請暑期工,我就去應徵。」

知道樂園設施位置

Louise獲聘到樂園內的商品部工作,因為有零售經驗,故工作很快上手。「樂園以旅客為主,見多咗唔同國籍嘅賓客,好似嚟自美國、日本及內地。我唔單止要處理貨品相關嘅問題,仲要了解園內設施嘅位置,教遊客點去,所以說話技巧有明顯嘅進步。」   16年畢業後,Louise再到樂園做兼職,「啱啱畢業,我想睇吓邊啲工種適合自己,一邊做平面設計freelance,然後一邊做迪士尼兼職。」她這次被分派去遊樂設施及賓客服務部工作,在森林河流之旅做船長,對她而言是一大挑戰,「首先工作模式與之前完全唔同,我要提醒參加者注意安全之餘,仲要講故事,有大量台詞要記,分別要用英文、普通話及廣東話去表達,每次開船前先會知要講邊種語言,都真係幾刺激。」

講英文成身震

自言英文比較差的Louise,工作令她大有進步。「最初訓練時唔敢講,一講英文就成個人震晒。我喺屋企會成日練習,令我認識咗好多生字, 好似Rino、Hippo及Giraffe。學識生字後,仲要識得調整語調,一時感覺輕鬆,一時要帶動緊張感。試過幾次後,我發現賓客唔會笑我講得唔標準,仲會好投入畀反應,慢慢建立到自信心。」   船上有二十多位乘客,要Louise一人面對,「好似有小朋友俾河馬或大象嚇親會喊,我就要即刻畀貼紙佢,安撫佢嘅情緒;亦有試過俾賓客challenge我,話啲動物係假嘅,我唔會同佢爭辯,反而會更投入去講故事,希望感染到佢;另外,我試過帶領全船人一齊唱生日歌,為佩帶生日襟章嘅賓客慶祝,真係好開心!」當問及有否聽聞過有賓客在河中裝水飲,雖Louise沒見過,但她說行駛期間真的要一眼關七,才可以確保賓客的安全。

要畫好比例

自小喜歡畫畫的Louise,在今年初留意到迪士尼動畫藝術教室有內部招聘,決定再次挑戰自己,嘗試新的工作。「讀中學時,我有修讀美術,有畫畫底諗住應該幾易上手,但畫迪士尼人物嘅比例要好精準先有神韻,畫圖形及對稱最難掌握。」   除了自行練習外,在教畫方面,Louise亦要重新學習,「我會睇吓同事點樣教,因為大部分都係小朋友,所以每個步驟都要具體去講,例如畫一個好似手掌咁大嘅圓形、眼睛要好似雞蛋咁上窄下闊、身體部分先畫個S字、腳就好似V字等,要用物件及英文字作比喻。」Louise指這些細節都要慢慢學習,看到賓客畫出滿意的畫作,她亦很有成功感。

先要冷靜自己

Louise自言比較外向,不論從事甚麼崗位,都喜歡與不同的人溝通,「面對唔同嘅問題,都有各種相應嘅解決方法,雖然有時遇到賓客會為排隊而鬧交,要搵上司幫手,但經歷愈多呢啲情況,就知道要先安撫雙方嘅情緒,只要提醒自己要比當事人冷靜,就可以處理得宜。」   於年尾,Louise希望轉為全職員工,「我呢一年都做緊兼職,年尾有機會有全職空缺,我可以申請。轉做全職後,我想試吓帶導賞服務,了解樂園每一個背後小故事之餘,仲可以訓練自己嘅語言能力。」

後記︰火車到那裏去

記者大學時期也曾在樂園工作,亦遇過問奇怪問題的賓客,故當Louise提到被賓客問園內小火車可否到九龍塘時,甚有共鳴。記得當時,那位賓客堅信當天是搭園內小火車由青衣到來,不信我們的解釋,我也只好不堅持,讓他儘管試試,不動氣便是贏家。除了練到與人溝通的技巧外,其實也練到自己的EQ。  

點入行?

賓客服務經理Joanne表示,迪士尼樂園不時都會有招聘活動,「最近萬聖節我哋都好需要人手。做款待專員最緊要唔怕辛苦,樂觀及笑容都好重要。如有興趣,可以透過網頁,遞交相關資料,再安排進行面試。」兼職款待專員時薪由$56至$66不等,按不同工種而定。款待專員會被分派到不同主題的園區,如冒險世界、明日世界及幻想世界等,職責協助賓客使用遊樂設施,「萬聖節嘅款待專員就會負責鬼屋嘅運作。」  

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup
© 2017 AD Internet Limited. All rights reserved. 版權所有 不得轉載