壹週刊 忽然一周 飲食男女 me! FACE Ketchup 交易通.搵車快線 NEXT+ONE Tomonews nxTomo 賞FUN享
2009年07月17日

隔牆有耳:戚眉廣告有人唔順超

52,221

老牌吉百利( Cadbury)朱古力近年銳意刷新形象刺激銷量,今年初推出全新電視廣告 Eyebrows,呢個廣告今個月初登陸香港,相信好多人睇過。新廣告簡而清,冇對白,僅得一對小朋友跟住電子錶節拍戚眉戚眼跳「眼眉舞」,喺外國出街後頻頻攞獎, YouTube點擊率逾400萬次,不過有香港人卻睇唔順眼,竟然有20人向影視及娛樂事務管理處投訴,批評教壞細路。

20人投訴教壞細路

據知戚眉廣告月初播出後,最少有20個市民向影視處舉報,不滿廣告教壞細路,擔心小朋友會有樣學樣擠眉弄眼,有失斯文;有個港大碩士生批評廣告令人睇到好唔舒服,指摘廣告公司唔應該搵小朋友做表演工具。
無綫亦證實外事部熱線收到三個電話投訴,無綫強調所有廣告出街前,都要經內部檢定小組審核,符合條例冇違規先會播出。根據程序,影視處接投訴後會要求播放廣告嘅電視台提供資料,若有涉嫌違反廣播條例,會交廣播事務管理局審議,暫時唔知有乜結果。

網民反應有讚有彈

呢個推銷牛奶朱古力廣告主旨係 Share the joy(開心預埋你),估唔到引起咁大爭議。八方問過一位師奶,佢直指廣告教壞人,不過佢個仔卻即刻模仿廣告眼眉跳,好鬼馬。網民意見更強烈,「睇完個廣告都唔知佢想做咩!」、「超唔鍾意呢個廣告。」甚至有人要求停播;亦有唔少人大讚廣告滑稽過癮,有創意,好吸引。
香港廣告商會主席袁文俊話,好廣告要有創意,吉百利廣告手法特別,能夠引起觀眾注意,佢話其實廣告商同創作人都好在意廣告會唔會惹人反感,否則損害品牌形象得不償失,佢舉例早排有個廣告拍攝低胸女侍應招呼細路顧客,咁樣推銷兒童餐效果可能適得其反。
代理吉百利嘅四洲公司話廣告以幽默手法表達分享歡樂訊息,喺其他地方播出後反應好好。八方認為,香港發展創意工業需要創意同包容,放鬆啲啦,香港人。

mailto:pf_lee@appledaily.com

江湖滾熱辣
隔牆有耳:立法會雙喜臨門
即like蘋果日報FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們
版權所有 不得轉載 ©2014 AD Internet Limited. All Rights Reserved