壹週刊 忽然一周 飲食男女 me! FACE Ketchup 交易通.搵車快線 NEXT+ONE Tomonews nxTomo
2011年07月21日

隔牆有耳:中大人嘆上海菜

11,441

大學飯堂出名難食,放得入口已經係享受,十元八塊「頹飯」係代表作,不過呢個定律即將被打破;中大新成立嘅和聲書院有新猷,書院會開一間正宗本幫上海菜館,全港大學只此一家。

李和聲要求保證正宗

中大師生有此口福,全賴捐錢創辦新書院嘅李和聲家族。李和聲係上海人,做金融生意大名鼎鼎,佢擔任榮譽創會會長嘅上海總會,係唔少中環人食上海菜首選,八寶鴨、圓蹄、燻蛋等名菜令人垂涎。為咗將美食發揚光大,和聲書院要求中標嘅上海菜館,必須聘請正宗上海菜師傅。
和聲書院院長劉允怡教授透露,為咗保證出品正宗,李和聲願意保送廚師到「上海總會」培訓,而且表明「師傅走一個培訓一個,直至有好上海菜為止」。上海總會係名人食肆,前特首老董、現任特首煲呔都有幫襯,中大人真係有口福。
劉院長又話民以食為天,為咗令收費平民化,學生都可以享用,所以「頭幾年唔收中標餐廳錢」。除咗有上海菜館,和聲書院仲有三間餐廳,包括薄餅店、咖啡室同美食廣場,劉教授揚言:「以後中大有優質咖啡飲!」
事實上中大咖啡質素一直被教職員詬病,十蚊八蚊一杯嘅咖啡令好多教授頭擰擰,和聲書院咖啡室行高檔路線,劉教授話質素會好過港大 Starbucks。劉院長對搞飲食咁有自信,原來有高人相助,請來老友、主持過電視飲食節目嘅醫學院教授莫樹錦加入書院膳食委員會,與中標餐廳開會,連薄餅做法正唔正宗都一清二楚!下年8月書院落成後,就可以試到好滋味。

通識教育加京劇元素

李老係金融界元老級人馬,鍾情美食亦愛京劇,擅長京胡演奏同伴奏,佢太太李尤婉雲係京劇名家梅葆玖的弟子,連江澤民都大讚李太:「唱得一流,連正式藝術家都服了她。」和聲書院下月24號有迎新營,劉院長話會力邀李老獻技,推廣京劇文化,據講書院亦會在通識教育加入京劇元素。

mailto:pf_lee@appledaily.com

江湖滾熱辣
隔牆有耳:和聲書院sell環保設施
即like《蘋果日報》FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘
版權所有 不得轉載 ©2014 AD Internet Limited. All Rights Reserved