壹週Plus Sudden+ 飲食男女 me! FACE Ketchup 交易通.搵車快線 Tomonews nxTomo
2013年05月18日

隔牆有耳:
政府壓抑樓市措施

24,543
■郭德亮指政府不應用行政措施干預地產市場。張志華攝

【隔牆對論】
近三個月,走過地產代理行,裏面只有經紀,沒有客人,與幾年前地產代理行「鎖舖」外出睇樓的墟冚場面,恍如隔世。二手交投量,上月低至2,400多宗,創1996年有紀錄以來的新低。四萬個代理,十人爭一客,這全拜額外印花稅、買家印花稅、雙重印花稅所賜。活在「冰河世紀」,地產代理聯會主席郭德亮說,撈了廿多年,一手、二手、工商舖齊齊失守,從未如此轟烈,預料代理行裁員倒閉前,或許要來一次上街遊行。諳熟房屋政策的李永達認為,調整只是剛剛開始,樓價未跌夠,不應因地產代理的一時生計而手軟。樓市冰封,只是言過其實。
記者:姚國雄

記:《蘋果》記者
郭:郭德亮,地產代理聯會主席,任職地產代理逾二十年

地產代理郭德亮:一刀切搞亂市

記:現時地產市道有多淡靜?
郭:有代理形容,𠵱家比沙士更差。沙士時,二手成交都係唔多,但工商舖仍然有得做,今次連工商舖都干預,成交量跌咗八成。一手住宅嘅新例撞正政府第三次出招壓市,新盤嚟唔切應市,一手、二手面臨好大衝擊,成交量跌得好緊要。
𠵱家每個月只有三千幾宗成交,呢行四萬個地產代理,平均每個月,10個經紀,只有一單生意,呢個慘淡的情況以往未試過。今次整個打擊面係幾大。我公司近呢三個月,一單買賣都冇做過,都係靠做租盤,因為真係好難做,情況係水深火熱。
記:代理行如何應付?地產代理如何面對?
郭:好多行家都要開源節流,面對寒冬。有行家十間分行cut五間,三間就cut一間,有規模嘅代理行,租約期滿唔續約;有員工流失唔請人;代理搵未做過嘅盤源;做開住宅嘅做埋工商舖,海外樓盤都關注吓,睇吓有冇機會做。部份有底薪同事轉冇底薪,做到幾多賺幾多,寧願拆高個佣,仲要減低廣告開支。
下一步,我相信會裁員,暫時未見到。但如果未來三、四個月成交量持續低迷,除咗有裁員潮,仲會有倒閉潮。如果政府唔去改善,低迷情況持續,再過多幾個月,好多代理失業,唔排除要發動上街遊行。
記:地產代理希望政府調整辣招,增加成交,但問題是現時呎價仍然偏高。政府應如何平衡?
郭:政府應該將市場分兩個,一個叫做投資市場,呢個市場自然調節,到咁上下就會自然調整,例如亞洲金融風暴、金融海嘯都會打擊呢個市場。香港係行資本主義,呢個係市場特色,唔能夠過份干預。
第二個市場,係住屋市場。有啲市民負擔不起樓價,就靠居屋、公屋,政府甚至可重推房屋免息貸款計劃,向低下層派租券,津貼佢哋租樓。
記:有人會覺得地產代理在政府未出招時很風光,如今樓價調整,生計也應差不到哪裏。你如何看?
郭:風光嘅係業主,我喺呢行廿幾年,經歷有高有低,我可以畀一個結論你,香港自回歸之後,樓市係好唔穩定,當樓市好嘅時候,民粹就會出來,話樓市好高,所以每一屆政府都會因應問題,做政策同措施去干預個樓市,要個樓市回落,但呢個上上落落,地產代理係要承受到好大嘅衝擊。
當年八萬五,由98年去到2004年,對整個市場係好大衝擊,中間仲有沙士,嗰時只有慘淡,差唔多三分之一嘅人離開咗呢行。風光都是在回歸前,因為嗰時個物業市場真係好熾熱,嗰時真係好風光。
記:政府未出招前,市場係可以如何瘋狂?
郭:2010年未出招前,只要你買到一個物業,只要唔係高過市價買,等一個月,即時有錢賺。嗰時好多人短炒、摩貨。因為由98年八萬五,個市積壓到2004年先升番,市民先回復信心,所以有炒風潮。但政府一出招,九成炒家離場。
記:現時買家、賣家心態如何?
郭:有買家本身想改善居住環境,但奈何政府推出多項措施,變咗買家換唔到樓。有人想投資保值,因為銀紙貶值。有買家想嚟執平盤,但係我可以同大家講,唔係好多,有少量業主調整到5%至10%,但唔係好大量,係好少,真正畀佢哋選擇嘅盤亦唔多。
至於賣家,九成業主都係保持以往態度,對樓市都係睇好,因為通貨膨脹,物價飆升,銀紙貶值,放喺銀行冇息,同埋𠵱家出租回報好理想,賣唔到咪租囉,放出嚟租,都好容易租到,所以佢哋不會大幅減價。
記:現時賣方不想賤賣,買方亦不敢買,成交如此低,誰人最大責任?
郭:我認為政府藥石亂投,因為民粹嘅關係,令政府要出招壓市,用行政措施去干預地產市場。政府措施方向啱,但做法有錯,因為措施內容,沒有尋求物業市場嘅問題。我哋應了解問題,找解決方法,將投資、自用市場分開。一刀切,將成個樓市都搞歪咗。連政府嘅綠悠雅苑,想幫助市民上車,但第一、第二輪,都唔夠人數去揀樓啦。

mailto:pf_lee@appledaily.com

世謬中心
隔牆對論:
房策專家李永達:調整啱啱開始
即like《蘋果日報》FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘
版權所有 不得轉載 ©2014 AD Internet Limited. All Rights Reserved