› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年03月21日

【有錢冇樓買】億萬身家富豪排「頭等隊」
買唔到匯璽

300,629
最後更新: 0321 16:30 / 建立時間 (HKT): 0321 00:00

【更新影片內容】

最近地產界流傳一個有錢佬都買唔到樓嘅個案,循例自稱真人真事,但內容嘅痴線程度,同希特拉都Cut唔到有線差唔多。

話說某有錢佬(下稱M君),好鍾意「某個名牌發展商嘅一個鐵路站上蓋樓盤」,一心想買好多間四房單位,但礙於發展商賣樓規定,最多都只能買三間,咁佢唯有照入票喇。

懷住興奮嘅心情去到賣樓當日,M君去到現場先發現原來好多、好多、好多好似佢咁嘅富翁都想掃貨,先心知不妙。拎住38號籌嘅M君,望住消耗板啲四房單位畀人不停掃走,「心裡面又驚又緊張」,去到36號籌果時仲要賣晒。

差啲先買到樓嘅M君深深不忿之下就埋怨代理,代理就神回應佢:「A1組有270組客登記,你抽到咁前已經好好,樓下仲有200幾個億萬富豪,連上黎望下個消耗板嘅機會都無,佢地至少都買6,000萬嘢㗎,仲有幾百組A2組買家,至少買3,000萬嘢,連抽籤機會都無呀!」

呢個個案講緊嘅幾乎喺新地(016)星期六南昌滙璽賣樓嘅情況。當日幾百個有錢佬一大早就要ICC做登記,連大手客都要分等級,會買2間四房排頭等隊,叫A1組,而2伙低層四房折實價夾埋的確要半億左右。

至於淨係想買1間四房加多間其他戶型嘅叫A2組,預算又真喺大約3,000萬。呢批身家至少幾千萬、甚至過億嘅A2組有錢人,星期六一大早就到ICC登記,然後過幾個鐘就被通知無晒單位畀佢地買,白白等咗一個朝早。

據出席A組揀樓的前線經紀透露,當日大手客時段都幾百人到場,但到中午12點半,突然有批客一窩蜂散水,原因是A組限定買家一定要買最少一伙4房,當A組59伙的4房戶全數被認購後,即是無4房單位做膽,不可以再繼續揀樓程序,繼而先開始B組(購買一間的客戶)揀樓時段。

不過發展商就從來無正式公佈A1同A2組嘅出席人數,所以實際有幾多有錢人撲空,就無從稽考。新地雷霆回應指,如今知道買家取態後,稍後會有適當既安排。被追問是否會預留更多單位予大手客,雷霆僅稱「畀啲耐性喇」。市傳新一批加推單位,A1大手客要買入更多四房單位,詳情有待發展商公布。

不過,同一個地方、同一家發展商,響4年前賣九龍站天璽,同樣吸引到大批千萬千萬富翁逼爆狂搶。不過,有個有錢人最終響排完幾次隊之後,終於得償所願,買到天璽加價後的單位,最後響舊年蝕讓三球收場。到底買唔到樓是福還是禍,始終要埋單計數先知。

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載