› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年07月10日

【好去處】港漫畫家手繪超精細恐龍 展覽吸細路粉絲

6,571
建立時間 (HKT): 0710 21:15

沉迷嗜好等如倒錢落海。港漫彩稿大師李健良(良哥)一倒就倒咗六年。佢辭工閉關,廢寢忘餐做「宅男」,追溯遠古時代生命起源,讓絕種恐龍在他筆下重生。他自資出版了三本繪本《古生命》,燒錢燒青春。最近他舉辦首個畫展,大人細路可走入這翻生恐龍館,上一堂簡易生物課。

良哥三本《古生命》繪本,由四十六億年前盤古初開的冥古宙,畫到六千五百萬年前白堊紀完結,是「古生物活字典」,這天遇上聲稱「任何生物都識」的五歲小朋友葉承旭(旭旭),展場玻璃貼有良哥畫的恐龍畫作,兩人立刻模仿恐龍靠近,「張牙舞爪」合照。愛閱讀有關恐龍書籍的旭旭,不消一小時已看畢良哥三部作品,看到未曾接觸的品種,例如帝王鱷,便多望幾眼,「本書好靚,但淨係畫恐龍好啲。」在良哥眼中,遠古時代生物邊只恐龍咁簡單,「我會提埋海洋生物,有啲侏羅紀已有,例如蟹及八爪魚等,現在仲存在。」旭旭恍然大悟,良哥再出題考佢:「侏羅紀有冇暴龍?」一般人容易答錯,旭旭信心滿滿秒回:「冇。」兩人更啱key到齊齊畫畫,良哥讚其畫功:「線條畫得好肯定,係天才嚟。」

專注畫畫六年 無悔零收入 
五十二歲的良哥在旭旭身上發現自己小時候的影子,當時親戚好言相勸,「大個唔好畫畫為生,否則餓死。」《中華英雄》漫畫啟發了他不會餓死的信念,立志以興趣為職業,1983年加入馬榮成的天下出版做助理,初初只負責執稿,後來馬Sir叫他參與畫圖工作。自小煲動物節目及紀錄片長大的良哥,一畫動物就滿心歡喜,培養他日後畫《古生命》的基礎。離開天下出版後,加入海洋創作至2010年辭職,選擇繪畫較冷門的遠古生物題材,「當大家做相同嘅嘢,例如畫武打漫畫,我唔會跟住做,因為比我出色的人有很多,不如專注畫自己鍾意嘅嘢。」良哥為《古生命》搏到盡,六年唔接job專注畫畫,零收入都無悔,「假設我月薪二萬元,計吓六年就知成本幾多。」他名副其實活出《風雲》的《冰心訣》:「心若冰清,天塌不驚」的精神。

良哥畫遠古生物繪本的構思,早於九十年代萌芽,當時他看了一首講述生命歷程的英文歌MV,歌名他已忘記,內心觸動卻難以忘懷,奈何當時他工時長到似匹布,朝早十一點開工,凌晨四點先收工。練功千日,用在一時,七年前他覺得是時候使出二十七年真功夫,仔細繪畫他心目中的遠古世界。其中書內一頁的一格,他花了超過五天才完成,他說:「喺出版業係匪夷所思。」畫生物絕不能馬虎,要參考多本動物書籍,不斷查證多次修改,他慨嘆:「睇資料睇到頭痛,都問自己點解咁辛苦。」三本書分別於2014至2016年推出,他笑說最怕被小朋友挑戰,「有次喺書展,有個小朋友攞住我本書話某隻長頸鹿出現於侏羅紀中晚期,而唔係書中所寫的晚期,惟有之後改版再修正。」

有麝自然香,良哥除了被邀請去學校分享,今年三月至六月獲馬來西亞檳城亞洲漫畫文化館邀請,展出《古生命》三本書的手稿,當地港漫粉絲由吉隆坡駕四小時車前往檳城,就為見偶像真迹一面,令他非常感動。他在香港展出複製原畫,視覺效果同樣震撼,恐龍迷及港漫迷不要錯過。

《古生命》複製原畫展
日期:即日至8月31日
地點:元朗公庵路68號溱柏屋苑商場A舖
查詢:facebook:古生命·李健良作品

記者:梁慧琳
攝影:劉永發(部份圖片由受訪者提供)

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup
© 2017 AD Internet Limited. All rights reserved. 版權所有 不得轉載