› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年03月21日

人和第一

29,910

三位特首選舉候選人參加七家電子傳媒聯合主辦之選舉論壇,在3月14日星期二舉行,左丁山一家吃過飯後,齊齊坐喺電視機前睇直播,其實全晚冇乜火花,兩男一女在台上,形成一個嬲字,女的篤定當選,講話早經編排,大打守勢波,務求不失球。兩個男嘅知道好清楚,互插毫無拉選票作用,為免浪費時間,一齊進逼唯一女士,視覺形象上好似係兩男蝦一女,其實係對女士有利。但女士自己擺咗兩個烏龍波喎,於是成為敗筆,次日要急急補飛,澄清又澄清,間接證明呢位未來特首一遇上壓力,就有可能出差錯,唔係幾穩陣嘅咋。
女士嘅第一個烏龍波係話香港嘅主流民意如與佢做特首嘅任務有衝突,就會辭職。左丁山一聽見,成個彈起,咁都得!佢真係夠膽辭職以謝港人?第二個烏龍波就係佢竟然公開大讚主要對手嘅公關有料到,如果當選,會聘請嗰位仁兄。咁講法,即係明踩自己班公關團隊(六大公司機構公關高手)唔係咁掂啫,即使真係咁,駛唔駛在全港觀眾面前講到明呀?
以左丁山之管理及打工經驗睇,女士競選團隊大概冇乜人和,成員個個係將軍,冇乜兵,好似散收收咁,以曼城球星嘅價錢,踢出最多修咸頓嘅足球水準,直情係貨不對辦。
最近歐聯16強對決,演出三場激情奇情戲劇。先係巴塞在主場反勝巴黎聖日耳門六比一,全隊球員鬥志昂揚到加零一,顯示出將帥兵和,上下一致之求勝決心,但點解第一回合先輸零比四呢?難道因為教練安歷基當時還沒宣佈今屆約滿就辭職?跟住係李斯特城主場以二比零氣走本來高出一皮嘅西維爾,敗部復活,昂然進入歐聯8強。第三隊係摩納哥,返回主場以3比1擊退曼城,憑作客入球出線。呢三場球賽有一個共通點,就係勝出一方皆有無比鬥志,無懼不利形勢,放手背水一戰,上場球員能完美執行教練既定戰術,尤其是李斯特城,泰國老闆無情無義趕走上屆拿冠軍嘅教練雲尼阿利之後,新教練沙士比亞(唔通會係大文豪後代?)得球員一致擁護,演出水準與上個月截然不同,今季李斯特城在英超聯賽由天堂跌落地獄,冠軍級球員如洩氣氣球,接連輸波,名次跌到去降班邊緣。但雲尼阿利被炒魷後,球員作戰精神即時返晒嚟,居然可以殺敗三屆歐霸盃冠軍西維爾!睇波可以領悟到撕裂球隊上下人和嘅領隊,球員本來好打得都冇用,想有成績,一定要有人和先至掂。

左丁山
電郵 :
mcwriter@appledaily.com

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup
© 2017 AD Internet Limited. All rights reserved. 版權所有 不得轉載