› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年09月14日

港獨.粗口

25,846

本欄曾經講過,左丁山搭地鐵,人多無位坐,一位中年婦人叫一位年輕少女讓座俾左丁山,點知少女嘅朋友,年約三十左右,立即用粗口大罵中年婦人多事,呢位幾靚嘅女子滿口男士性器官,左丁山聽見,為之側目。
大編輯因大學生講粗口之事,想起未退休前在報館主持採訪會議,記者編輯有老有嫩,睇緊新聞稿之際,突聞連聲粗口,抬頭一望,竟是兩位新請,剛從大學新聞系畢業嘅女記者,不禁吃咗一驚,一時反應唔到。會議後,佢捉住中年採主問:「係唔係你地教壞佢地兩個吖?」採主大笑:「一入嚟就識粗口多過我呀!」大編輯服務過不同報紙老闆,啲大老闆開會時,即使有女高管在場,開口咪又係粗口爛舌滿天飛,出席女士當老闆唱歌而已。
中大學生用粗口講港獨,可分兩個層次。第一,講港獨絕對係一小撮大學生範圍之內嘅事,絕大部份大學生冇咁蠢,認為港獨可行,對此議題冇興趣,甚冷淡。學生會從來都是校園內一小撮學生佔據嘅,未必有廣泛支持基礎,左丁山假假地曾經係學生領袖,做過中文大學學生會籌備委員會主席,參與草擬中大學生會會章,後來成立中大學生會,選出羅祥國(新亞經濟72)為第一屆中大學生會會長,故此對學生會由少數學生話事,大部份學生懶理之情況,略知多少。為咗一個過氣學生會會長而大動肝火,群起譴責,實在益咗佢嘅知名度。
第二,大學生講粗口,就係涉及全個校園嘅問題,已成為大學校園流行次文化。前日與一名今年畢業嘅中大學生談及講粗口,佢話香港嘅大學生講粗口,十分平常,隨處都聽得到,佢在中大四年,最後一年住新亞紫霞樓,就更加了解中大學生傾偈經常不離粗口,所以佢都見怪不怪,前新亞會長在受刺激被挑戰之情況下,講粗口更是自然反應,唔講先至奇怪。有人話要怪責大學教授,其實教授在課堂上(如政治系)會講政治、台獨、疆獨、港獨,但一定唔會教講粗口,今天香港社會講粗口,似乎視作平常,馬場會員廂房之內,啲廠商粗口大大聲講,冇人敢干涉。據年輕朋友告知,網上電台紅人黃毓民蕭若元好受歡迎,做節目時粗口不絕,黃毓民尤其講得暢順,中大學生會好似每每待他如上賓,點解如此,左丁山呢一輩好難明白。中聯辦董建華更加之離地,回歸二十年,今天大學生就是在此二十年成長,佢地嘅思想行為完全與港英殖民奴化教育無關!

左丁山
電郵 :
mcwriter@appledaily.com

關心你飯碗 貼近你生活 即Like「蘋果ATM」FB專頁!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載