› 選擇地區
三藩市
紐約
洛杉磯
其他美國地區
蘋果基金 Next Digital
香港  台灣 
2017年05月19日

【專題籽】患癌媽媽重拾畫筆 盲畫途人鼓勵活在當下

5,765

【專題籽:胚芽故事】
首次見翟苑芝(Belle)是在市集裏,頭髮短短樣子可人的她替人畫人像畫時,不望畫紙卻畫出可愛的人像。好奇心驅使下上前與她傾談,始知她用的是小學時老師教協調五官的盲畫方法,而選擇這種繪畫方式,全因為她一年前患癌的經歷,令她對生命有新的體會。

今年三十多歲的Belle自小就很喜歡畫畫,夢想是當電影海報的畫家,或者替警察緝兇的拼圖專家,雖然冷門,但看得出她打從心底愛繪畫。5、6歲時畫風景動物,小學開始學素描,中學還選取美術科為選修科,「媽媽見到我鍾意畫畫,覺得值得栽培就帶我去學,老師亦給了我很大信心,認定我美術科坐B望A。」會考時,在考場眼見其他考生都照辦煮碗參考書的畫法,自己則由零開始自由創作,自信滿滿,豈料最後得D,令她崩潰了,「細個覺得會考簡直係人生大事!攞到成績表嗰刻,會諗如果當初學其他學生做法,會唔會仲高分。多少覺得懷才不遇,嬲咗自己就決定唔再畫。」或許和自己鬥氣,大學選讀了與畫畫南轅北轍的公共關係,畢業投身商界當了十年營銷,負責把包裝品牌講到美輪美奐,說服客人花錢買,「其一係否定咗自己,其二係香港會令你感受到藝術搵唔到食,如果我堅持其實可能殺出一條血路,但我冇做到。」畫筆等工具,從此統統收進家裏床下底或抽屜,一年最多見光數次。

在家養病 盲畫學習放鬆自己

數年前她做家庭主婦,生活較休閒,但或許與自己鬥氣得多,性格又對自己充滿要求,去年旅行時感覺到胸口腫脹,返香港檢查後發現患上乳癌,「我好記得確診第二日去睇小朋友表演,一邊用錄影機拍一邊兩行眼淚流出嚟,驚睇唔到阿仔長大,覺得無可能有下一年。」在家人支持下,才慢慢平復心情,下定決心醫好病,開始做化療之餘,每三星期去醫院打一次針,健康狀況轉差,「每次喺屋企唞都會攰,乜都唔想做,連飲杯水都覺得無力。但我又冇理由不停上網,就惟有喺櫃桶搵番晒啲畫具出嚟畫。」腦海忽然閃過以前學的盲畫技巧,就不停瘋狂望住來畫畫畫,「例如我唔食得壽司、刺身,嗰日想食乜就畫乜,望梅止渴吓。」不過盲畫,講就容易,點忍得到唔望畫紙?她笑說:「會㗎!第一次畫一杯熱檸水,會諗個杯嘅耳仔畫乜位置呢,會好想偷睇自己畫得靚唔靚。」直至對着鏡盲畫自己,成品竟然與父親有八分相似,畫出個美麗意外,才發現原來自己一直對任何事都過份執着,「自己完全冇諗過畫出老竇,嗰一刻笑咗。我以前好怕畫人,因為仔細到要留意有幾多眼睫毛,但用盲畫就很舒服,連左右眼比例都不需要理會。」慢慢地,便透過盲畫學懂放鬆自己、放開自己,接受不同的結果,正如面對癌症一樣。

康復後遊走街頭 與人交流放下執着

幾個月前康復,她拿起畫筆到市集或街頭遊走,替人畫人像,更讓客人自由定價,「我唔介意唔收錢,但我唔想俾人感覺係所有藝術家都係免費,而且免費可能會多咗人嚟,變相令交流嘅時間少咗。」她直言錢不是主因,而是想和陌生人進行有質素的溝通多於寒暄,還不時邀請對方拿起畫筆與她對畫:「但係好多人都唔會試,因為有個框框限制,會話自己係幼稚園級,但其實畫畫箒,人人都畫得靚!」別人替她盲畫的作品她都一一收藏,因為在她眼中,其他人的畫作同樣美麗又有藝術價值。她希望鼓勵更多人面對面的交流,並提起有次大學演講後遇到有女孩在傾談時忽然大哭的經歷:「嗰一刻我都驚係咪自己講錯嘢,佢之後解釋原來我講嘅說話勾起了她家人患病一些往事,我就同佢講:『唔緊要,即管喊出嚟』。其實人每日不停放情緒喺心裏,但偏偏冇人覺得要屙出嚟!」對方臨別感謝她治癒了她未有正視的傷口。Belle因此第一次覺得弄哭他人而感到欣慰,因為她令對方有放鬆的機會,同時信任自己。「一幅畫可能三分鐘就畫完,但你可能從來無望過朋友三分鐘。」她以此道理鼓勵身邊人去盲畫,打開心扉交流,並利用她的畫筆身體力行,嘗試放下對自己的框框和執着,因為活在當下才是最重要。

facebook:alittlebigco

記者:鍾藹寧
攝影:王國輝
編輯:梁浩維
美術:黃創泰

追實城中突發大小事,即 like 蘋果【現場】FB!
返回最頂
香港 台灣 用戶登入 新登記 私隱聲明 服務條款 刊登廣告 聯絡我們 招聘 訂閱版: 壹週刊|    飲食男女|    Ketchup
© 2017 AD Internet Limited. All rights reserved. 版權所有 不得轉載